إسمي محمود النجار شاب من ذوي الهمم إعاقة بصرية بشوف بعين واحدة ودرجتها 1 / 60 إتولدت فاقد الرؤية وبعد عمليات كتير جدا الحمد لله وصلت لإني شوفت أمي وشوفت الألوان والدنيا ودخلت مدرسة النور للمكفوفين وإتعلمت ودخلت الجامعة واخدت شهادة جامعية وكمان إشتغلت مدرس اللهم لك الحمد كل ده بفضل ربنا ثم أمي الله يرحمها علمتني إزاي أعتمد على نفسي ومحتجش لحد علمتني إن مفيش حاجه إسمها ظروف أو إعاقة إللي عايز يعمل حاجه هيعملها إللي عايز ينجح هينجح الحمدلله إتعلمت حاجات وعملت حاجات كتير أوي في ناس سليمة ومتعرفش عنها شيء إتعلمت لغة برمجه وبقيت بصمم مواقع إتعلمت الفوتوشوب وبقيت بثمم لوحوهات وصور ومحتويات إعلانية إتعلمت ماركتينج وبقى عندي صفحات كتير ببيع عليها منتجات إتعلمت صناعة محتوى وعملت قناة على يوتيوب وبصور فيديوهات واخيرا وليس اخرا التدوين وعندي مدونتي اللي بتشوفوها حاليا ي اللهم لك الحمد وهفضل لاخر نفس في عمري اجتهد واتعلم طول ما فيا نفس لان هو ده الصح وهي دي الحياة اللي لازم الانسان يعيشها ميقولش مقدرش وعندي اعاقة يتعلم ويحاول ويجتهد لحد ما يوصل لهدفه .
انا دي حكايتي بإختصار وهتلاقوا على المدونة حكايات كتير لناس زيي خرجوا برة صندوق الاعاقة وعاشو حياتهم صح وكمان أخبار ومقالات واوراق وحاجات كتير جدا يارب تعجبكم ❤
